近幾日英國熱門話題除咗C朗接受Piers Morgan訪問炮轟曼聯，另一個就係財相侯俊偉嘅秋季財政預算。大約兩個月之前，前財相關浩霆先公布450億英鎊「小型」預算案減稅刺激經濟，但秋季預算變為減開支及加稅550億鎊，極速由寬鬆轉為緊縮、相差千億，呢頭話帶大家去omakase，轉個頭就逼大家食營多，令民眾頭暈轉向，親保守黨傳媒如Daily Telegraph都連日出文，批評預算案違背保守黨低稅率承諾。
侯俊偉秋季預算案演詞文字雲
近7000字預算案中，侯俊偉反覆提到要做「difficult decision」，包括要投資者幫手填補財政黑洞。佢表明要進一步向unearned income徵稅，股息免稅額減半到1000鎊，到2025年更會減到得番500鎊；資本增值免稅額門檻都會調低，原本12300鎊，到2024年會大幅降低到3000鎊，投資所得將會有更大部份要與英國政府分杯羹。
金融市場對呢份預算案反應平靜，並未好似9月短命小型預算案咁令英鎊急挫、債息急升。卓慧思同關浩霆籌備小型預算案時，一改慣常做法，表明唔會同時委託監察公共財政嘅預算責任辦公室(Office for Budget Responsibility，簡稱OBR)分析預算案建議對經濟影響，動搖市場對英國恪守財政紀律信心。今次秋季預算就配合番OBR預測出爐，即使對黎緊經濟前景評估悲觀，但就俾番金融市場信心。
OBR Chair Richard Hughes
OBR話事人Richard Hughes喺預算案公布後一日出席智庫Institute for Government研討會，筆者走咗去聽。佢提到由前年疫情到目前俄烏戰爭觸發嘅能源危機，英國正面臨近五十年來最動盪時間，不穩定因素增加、市場震盪更頻密，要做準確預測難度更高。聽到呢度，自然諗到普通投資者要喺咁嘅環境下投資獲利，亦係高難度動作。
香港同英國都面對經濟衰退，香港主旋律著力說好香港故事，英國呢邊就幾乎一面倒地悲觀。有保守黨國會議員私下形容秋季預算案等如宣告下屆大選無望，個別議員已經預早為敗選後生計作打算。民調大幅領先的工黨，其實亦無具體方案應付目前問題，民意只反映對保守黨不滿。另外唔少人仍然放唔低六年前脫歐公投，繼續將目前種種問題歸咎當日決定。G7國家中，英國係疫情以來唯一經濟收縮國家，壞消息數極唔完，好彩英格蘭喺世界盃打響頭炮，結束國際賽六戰不勝劣績，睇下整體經濟係咪可以好似隊波咁盡快操番起。