世界盃英格蘭八強出局，又再被十二碼魔咒纏擾。呢屆好有機會係美斯、C朗、摩迪、蘇亞雷斯等老將最後一屆出戰，數番由1986年開始，今屆已經係自已睇嘅第十屆世界盃，忽然諗起年紀唔細，唔知仲有幾多屆可以睇，睇一場、少一場的事實都幾得人驚。
英格蘭出局後，傳媒焦點重返殘酷現實，關注聖誕新年前護士同救護車司機在內的連串罷工，彭博英國專欄作家話，今年聖誕新年願望就係唔好有乜病痛，否則除時因為罷工去唔切醫院，就算成功達陣都可能要喺急症室等十幾個鐘。
倫敦落咗今年冬天第一場雪，有錢嘅可以喺屋企開大暖氣欣賞雪景，有病直接去睇私家醫生; 已退休又唔夠錢嘅，就算人無事，都要為高生活成本下的heating or eating問題而煩惱。
英國每年70至80萬人到退休年齡，高通脹下退休金開支對政府財政壓力更大，保守黨暫時繼續按通脹調升退休金額，但另一方面想辦法調高領取國家退休金年齡，原本計劃2039年先將領取年齡提升到68歲，但傳媒引述政府消息話可能會提早到2033年就咁做，估計幫到英國庫房慳番600億英鎊。已屆中年先過嚟嘅香港人仲要面對多一個問題，呢邊規定要最少供10年先可以領取部分退休金，要全數領取更要供夠35年，亦即係日後退休要全數攞番供款並唔容易。
想靠投資提早上岸嘅，今年亦當然係難捱一年，市場震盪加上高通脹，無論係股債六四或八二開，亂打亂撞的話退休資本今年可能大縮水。面對未知嘅退休年期同所需金額、加理越來越艱難嘅市場環境，無論係英國或美國，都有報道話原本打算50幾歲就提早靠投資收入提休嘅，都要被逼重返職場。
AI又係咪可以為投資退休搵到啟示? 呢排大熱的AI對話系統ChatGPT，大家可以搵佢幫手改電腦程式編碼、寫求識信、度劇本、講笑話、幫莎劇諗續集等等，將睇落不相關事物組織梳理，包括近乎即時解答到點將莎劇哲理應用喺投資退休上面。喺Google打Keyword都可能搵到相關網頁，但呢個系統更進一步，可以要求佢簡單總結或更深入闡釋個別觀點，有同真人探討問題感覺。未來除咗世界盃，另一樣好想睇嘅就係AI可以發展到乜野地步。
