第一次外國睇世界盃，今屆卡塔爾主辦時差好夾歐洲時區，分組賽四場波最早朝早十點、最晏夜晚七點開波，唔駛喺香港咁要較鬧鐘凌晨起身。亦好彩呢邊政府將能源價格所謂「上限」暫時壓低到每年2500英鎊，否則按市價每年4200鎊收費的話，除番開每個月平均電費要超過三千港紙，隨時大家開電視睇波都要諗過度過。不過想幫英格蘭打氣，超市仲係有唔少平價貨可以揀。
睇完波回歸現實，能源危機持續通脹高企，醫護爭取加薪計劃罷工、主流大報警告英國急症護理系統瀕臨崩潰，每日超過四千名病人要等十二個鐘睇急症；英國鐵路運輸工會又計劃新一輪工潮，聖誕前都有罷工。節日無助經濟反彈，餐廳酒吧指聖誕旺季訂位暫時差過去年，業界組織UKHospitality調查，指市道欠佳加埋能源價格令經營成本急升，三分一受訪餐廳酒吧出年初有倒閉風險。首相辛偉誠上任無耐，保守黨仍然內鬥不斷，繼續係好消息欠奉。
咁嘅背景之下，傳媒繼續放大針對英國經濟同英鎊不利消息，每當英鎊受壓每每上即時財經新聞頭條，若果唔check匯價單憑新聞估英鎊走勢的話，可能以為英鎊兌美元已經跌穿一算。事實係英鎊由九月底歷史低位大幅反彈，今個月挑戰超過兩年以來最大單月升幅，一度去番1.21附近三個月高位。美金本身受壓，通脹低過預期、聯儲局議息紀錄口脗偏鴿造就英鎊回升。
今年200幾個交易日，英鎊兌美元超過一成半日子單日升跌幅超過1%，近三個月更加試過單日升跌3%，相對港元，轉用英鎊做本幣要適應更大波動幅度，英國身為G7，但經濟不穩貨幣波動，被大行質疑有新興市場貨幣影子。目前應該留番D港紙/美元等時機買港股美股，或趁英鎊兌港元未上番十算時兌多D生活費，類似貨幣組合考慮，為股票投資以外又增添咗煩惱。
The Daily Telegraph, 11月1日
同埋喺一個悲觀氣氛充斥之下嘅環境，亦會增加投資雜音。呢邊傳媒似乎信奉Murphy’s Law，好多野都係向壞方向諗：氣象部門做冬季天氣預測，話今個冬天75%機會氣溫同過往平均差唔多甚至較暖，但新聞標題就強調有25%機會天氣嚴寒，甚至可能觸發能源供應恐慌；世界盃分組賽英格蘭大勝伊朗後，悶和美國隨即被大肆抨擊… 咁嘅取向下，英鎊呢輪反彈，傳媒提及次數亦自然遠不及受壓嗰陣。純靠睇新聞做投資易出事，喺英國問題可能更大。