大家好，我係漁夫系統新用戶 Fisherman’s Friend，黎咗英國一年有多，想分享下呢邊生活同投資體驗。
香港英國相隔超過9500公里，但心理上距離並無拉遠好多，同香港親朋戚友仍然可以日日手機見面，港聞繼續觸手可及，賣座港產片未至於英國同步上映，但相隔無耐都睇到。
呢一浪移民嘅比起八、九十年代一批，可能未必深切體會到何謂「身如不繫之舟」，但不時仍有身處異地的違和感。例如入戲院睇《緣路山旮旯》，接近兩個鐘完全投入香港場景之後，就算散場行番出街係Piccadilly Circus，但腦中自動堆疊出以往見慣見熟的沙田UA一帶，突如其來的反差錯亂，一時間會難以接受。
另一個違和之處，就係仍然心繫港股，但操作有心無力。遙想當年羽扇綸巾，左手掌Bloomberg、右手控Refinitiv Eikon，同戰友們一齊食大浪，新股認購例不虛發，談笑間檣櫓灰飛煙滅。
轉場之後，一度希望同香港昔日戰友拍住上，但呢邊冬令時間要等到凌晨1點半香港先開市，天寒地凍待命出擊，隱隱體會到當年冰雕連嘅悲壯。夏令時間夜晚係無咁凍，但可惜就要等多一個鐘，到凌晨2點半先香港開市，同樣難以保持清晰頭腦，極易做錯決定。更慘烈係呢邊深宵肚餓之時，香港戰友WhatsApp Group不停彈出連串早餐落單message，見到熱奶茶、蝦米腸，有得睇無得食，火都嚟；到佢地瞓夠食飽準備出擊，自己就往往頂唔順眼瞓想熄機，氣勢潰散，難有作為；一度勉強出手招損，心理壓力更大，攰住都無覺好瞓。
勉強無幸福，之後唔少時間係名符其實嘅養精蓄銳，大家香港博殺，我就瞓咗無睇。港股表現慘不忍睹，呢一年不停重覆嘅經驗，係第二朝起身開個手機App睇市，經常俾恒指跌幅嚇親。去年離港時恒指二萬七，一年間跌一萬點；明源雲(909HK)舊年初放走時46蚊，依家跌到大約4.6，恍如隔世。
三年前從未諗過要離開主場作戰，但現實不以個人意志轉移，投資玩法亦要改變。希望一路熟習系統，從各項指標同選股條件歸納到安心出手之選，減少過份貼市操作，做到喺呢邊凌晨都「瞓住贏」。